Y cynnig yw creu Pentref Llesiant newydd, gyda thua 250 o gartrefi newydd wedi’u hadeiladu o fewn amgylchedd sy’n hyrwyddo iechyd a lles.

Mae ffocws ar greu cartrefi newydd i bobl hŷn, wedi’u hadeiladu o fewn cymuned oedran cymysg, gyda chymysgedd o gartrefi ar werth a chartrefi i’w rhentu gan y Cyngor.

Y nod yw i’r Pentref Llesiant gael ystod eang o gyfleusterau cyhoeddus newydd.  Gallai gynnwys Hyb Cyngor, cyfleusterau iechyd, caffi a gofod cymunedol hyblyg.

Bydd mannau awyr agored o ansawdd uchel. Gallai hyn gynnwys:

• Sgwâr Cyhoeddus – Gofod cyhoeddus bywiog wrth galon y cyfleusterau cymunedol, lle gall pobl eistedd, cwrdd â ffrindiau a chael coffi yn y caffi.
• Y Maes – Man gwyrdd yng nghanol y cynllun yn diogelu’r coed aeddfed presennol ac yn hyrwyddo chwarae anffurfiol.
• Coedwig Wyllt – Ardal goediog fawr a fydd yn cael ei chadw ac sy’n hygyrch i gerdded drwyddi.
• Gardd Gymunedol – Gofod cymunedol i dyfu bwyd
• Llwybr y Bryn – Llwybr rhwng Ysgol Gynradd yr Eglwys yng Nghymru Sain Ffagan a’r sgwâr newydd, lle gall plant gerdded yn ddiogel i’r ysgol a chwarae ar ochr y bryn.

Bydd mynediad i gerbydau i’r tai a’r cyfleusterau cymunedol ar safle Coleg Llanfihangel o’r fynedfa bresennol oddi ar Heol Llanfihangel. Mae potensial i greu cysylltiadau cerdded/beicio newydd i helpu i wella mynediad o’r ardal gyfagos i’r cyfleusterau cymunedol.

Bydd y datblygiad hefyd yn cynnwys hen Dafarn Llanfihangel.

Anfonwch unrhyw sylwadau neu gwestiynau at: DatblyguTai@caerdydd.gov.uk.